Fransiyadagi harbiy baza yaqinida qo‘lga olingan erkak terakt tayyorlaganini tan oldi

Fransiyada IShID terrorchilik guruhiga aloqadorlikda gumonlanuvchi ekstremist hujumni rejalashtirganini tan oldi, deb yozadi “Gazeta.ru”.

5-may kuni kechqurun Fransiya g‘arbidagi Normandiya viloyatida Evryo harbiy bazasi yaqinida sobiq harbiy xizmatchi hibsga olindi. U terakt tayyorlashda gumon qilindi.

34 yoshli erkak yakka o‘zi IShID nomidan terakt uyushtirishni rejalashtirgan. So‘roq chog‘ida u shunday niyatda bo‘lganini tan oldi.

Tergovga yaqin manba xabar qilishicha, IShIDga aloqadorligi haqidagi bayonotini erkak videoga olgan, u uning mashinasidagi fleshkadan topilgan.

Gumonlanuvchi 2013-yilda armiyadan ketib, so‘ng islom dinini qabul qilgan, 2014-yildan buyon u qattiq kuzatuv ostida bo‘lgan.

Hozircha huquq-tartibot organlari xodimlari erkak harbiy baza yonida aynan nima ish bilan mashg‘ul bo‘lgani va unga kirgan-kirmaganligini aniqlay olmadi. Harbiy bazada Fransiya prezidenti Fransua Olland foydalanadigan A330 samolyoti ham joylashgan.

“Daryo”ning Telegram’dagi rasmiy kanali — @toshqindaryo’ga a’zo bo‘ling!