Suriyadagi front chizig‘ida har kuni 15 ga yaqin terrorchi-xudkush portlamoqda

Suriyada terrorchi-xudkushlarning front chizig‘i bo‘ylab hujumlari soni kundan kunga ortib bormoqda. Bu haqda, Rossiya Mudofaa vaziri Sergey Shoyguga asoslanib, “RIA Novosti” xabar bermoqda.

Uning so‘zlariga ko‘ra, terrorchilar nazorat qilib turgan hududlar qisqarib borgani sari, xudkushlarning hujumlari soni ko‘payib bormoqda. Shoyguning qayd etishicha, bunday hujumlar nafaqat individual ravishda, balki “jihodmobil” va mototsikllarda ham amalga oshirilmoqda.

“Ba’zi kunlarda 16—18 tagacha shunday hujumlar qayd etilmoqda. Bu hali hech qanday texnikasiz ro‘y berayotganlari. Turli texnika, zirhli mashinalar vositasida kuniga sakkiztagacha hujumlar yuz bermoqda”, — deya qayd etdi vazir.