Shvetsiya va Urugvay Xavfsizlik kengashiga Suriya bo‘yicha yangi rezolyutsiya loyihasini taqdim etdi

Shvetsiya va Urugvay BMT Xavfsizlik kengashi a’zolari orasida Suriyada kimyoviy qurol qo‘llanishini tekshirish bo‘yicha missiya faoliyatini tiklash bo‘yicha rezolyutsiya loyihasini tarqatdi. Bu haqda Rossiyaning xalqaro tashkilotdagi vakolatxonasi matbuot kotibi ma’lum qildi, deb xabar berdi “Korrespondent.net”.

“Shvetsiya va Urugvay BMT Xavfsizlik kengashiga missiya faoliyatini tiklash bo‘yicha navbatdagi murosaga asoslangan loyihani taqdim etdi”, — dedi matbuot kotibi.

Suriyada kimyoviy qurol qo‘llanishini tekshirish bo‘yicha missiya mandati 17-noyabr kuni yakuniga yetgan, Xavfsizlik kengashi to‘rt marotaba urinib ham uni uzaytirolmagandi.