Xor-Fakkan qirg‘oqlarida o‘lik kitning tanasi topildi

BAAning Xor-Fakkan shahri qirg‘oqlarida kitning nimtalangan tanasi topildi. Rasmiylar o‘lik kitni qirg‘oqqa chiqarishga va uning suyaklarini keyingi yil ochiladigan Kalba qo‘riqxonasiga osib qo‘yishga qaror qilgan. Bu haqda UAE Inside xabar berdi.

Kitning 16 metrli tanasi xalqaro port yaqinida topilgan. Uni mahalliy baliqchilar payqab qolgan va qirg‘oq qo‘riqlash xizmatiga xabar bergan.

Atrof-muhitni va Sharjadagi qo‘riqlanadigan hududlarni muhofaza qilish boshqarmasi raisining ma’lum qilishicha, kitni qirg‘oqqa olib chiqish bo‘yicha ishlar olib borilmoqda. Qo‘shimcha qilinishicha, kitning tanasida kema parragidan olingani taxmin qilinayotgan jarohatlar bo‘lgan. Bu jarohatlar uning o‘limiga sabab bo‘lgan. Dengiz oqimlari va to‘lqinlari esa uni BAA akvatoriyasiga olib kelgan.