AQSh Suriya rasmiylarini Sharqiy Gutada kimyoviy qurol qo‘llashda aybladi

AQSh davlat kotibi Reks Tillerson Suriya rasmiylarini mamlakat hududida kimyoviy qurol qo‘llashni davom ettirayotganlikda aybladi. Bu haqda “Vedomosti” xabar bermoqda.

Tillersonga ko‘ra, oxirgi marta gazsifat xlor qo‘llangan hujum 22-yanvar, dushanba kuni amalga oshirilgan.

Hukumat qo‘shinlari Sharqiy Gutada isyonchilarni bombardimon qilishda kimyoviy qurol qo‘llagan. Buning oqibatida 20 nafardan ortiq tinch aholi vakili, asosan bolalar halok bo‘lgan. 

“Rossiya ham Sharqiy Gutadagi qurbonlar uchun aybdor. Chunki kimyoviy qurol qo‘llanishi Rossiyaning Suriyadagi mojaroga aralashuvidan so‘ng boshlandi”, — dedi Tillerson.