AQSh haligacha Suriya bo‘yicha Ostonadagi muzokaralarga taklif etilmadi

AQSh Suriyadagi vaziyatni tartibga solish bo‘yicha Ostonadagi to‘qqizinchi xalqaro uchrashuvda ishtirok etish uchun hali taklif etilmadi. Bu haqda 2-fevral, juma kuni AQShning Qozog‘istondagi elchisi Jorj Krol jurnalistlarga ma’lum qildi, deb yozadi “TASS”.

“Qozog‘iston tomonidan hali taklif olmadik (Suriya bo‘yicha Ostonadagi muzokaralarda ishtirok etish uchun),” — dedi Krol.

2017-yilning dekabrida Qozog‘iston poytaxtida Suriya bo‘yicha sakkizinchi xalqaro uchrashuv bo‘lib o‘tgan edi. Suriya bo‘yicha navbatdagi yuqori darajadagi xalqaro uchrashuvni Ostonada 2018-yilning fevral oyi ikkinchi yarmida o‘tkazishga qaror qilingan.