O‘zbekistonda uch kun ichida ikkinchi marta YPX inspektorini urib ketishdi

O‘zbekistonda uch kun ichida ikkinchi marotaba yo‘l harakati qoidalarini buzgan haydovchining Yo‘l-patrul xizmati xodimini urib ketishi holati kuzatildi, deb yozadi “Podrobno”.

“3-fevral kuni 11:20 da Buxoro viloyatining Peshku tumanida yashovchi 1983-yilda tug‘ilgan F. Baqoyev Ibn Sino ko‘chasida Spark rusumidagi avtomobilni boshqarayotib, ushbu ko‘chada xizmat o‘tayotgan Yo‘l harakati xavfsizligi boshqarmasi Yo‘l-patrul xizmati inspektori T. Asadovni urib ketdi”, — deya ma’lum qilishdi IIVda.

Olgan jarohatlari natijasida Asadov kasalxonaga yotqizildi. Ayni paytda tekshiruv olib borilmoqda.

Nashr eslatishicha, 1-fevral kuni Xivaning Amir Temur ko‘chasida “VAZ-2107” avtomobilining mast haydovchisi YPX inspektori H. Hayitovni urib ketgan edi.