O‘zbekiston Superligasi start oldi. Amaldagi chempion yirik g‘alaba bilan boshladi, vitse-chempion “Nasaf” esa Farg‘onada ochko yo‘qotdi
Kecha — 1-mart kuni futbol bo‘yicha O‘zbekiston Superligasi bellashuvlari rasman start oldi.
Chempionatning birinchi o‘yinida mamlakatning amaldagi chempioni “Lokomotiv” Navoiyda “Qizilqum” ustidan yirik g‘alabaga erishdi — 3:0. O‘tgan mavsum to‘purari Marat Bikmayev mavsumning ilk goliga mualliflik qildi.
“Championat.asia” nashri ma’lumotiga ko‘ra, “Lokomotiv” ketma-ket 9 ta o‘yindan buyon “Qizilqum”ni taslim qiladi. Shularning so‘nggi 7 tasida Navoiy klubi “temiryo‘lchilar” darvozasiga yo‘l topa olmagan. Oxirgi 6 ta o‘yinda esa Marat Bikmayev raqib darvozasiga gol urgan.
Kunning ikkinchi o‘yini Farg‘onada o‘tib, “Neftchi” Qarshining “Nasaf” klubini qabul qildi. Mazkur bellashuvni MOQ prezidenti Umid Ahmadjonov ochib berdi.
Vitse-chempionga qarshi saf tortgan “Neftchi” futbolchilari 0:0 hisobida durang o‘ynashga erishdi. Uchrashuvdan keyin farg‘onaliklar ustozi Sergey Kovshov durangdan xursand ekanini, “Nasaf” bosh murabbiyi Ro‘ziqul Berdiyev esa natijadan ko‘ngli to‘lmaganini qayd etib o‘tdi.
O‘zbekiston Superligasi
1-tur bellashuvlari
1-mart, payshanba
Gollar: Marat Bikmayev, 33 (0:1). Ikrom Aliboyev, 57 (0:2). Sardor Mirzayev, 90 (0:3).
2-mart, juma
“Paxtakor” — “So‘g‘diyona” 20:00
3-mart, shanba
“Buxoro” — “Qo‘qon-1912” 18:00
“Bunyodkor” — AGMK 20:00
4-mart, yakshanba
“Metallurg” — “Navbahor” 15:30
Manba: Daryo.uz