O‘zbekistonda terrorchilik tashkilotining a’zosi 18 yilga ozodlikdan mahrum etildi

Andijon viloyati jinoyat ishlari bo‘yicha Xonobod shahar sudi “O‘zbekiston islom harakati” terrorchilik tashkilotining a’zosi, 1977-yilda tug‘ilgan Amirsaid Bаhodirovga 18 yil qamoq jazosini tayinladi. Bu haqda “RIA Novosti”ga tayanib, “Darakchi.uz” xabar berdi.

Tergov ma’lumotlariga ko‘ra, ayblanuvchi 1990-yillarning boshida diniy aqidaparastlar ta’siriga tushib qolgan. 1998-yilda u Afg‘oniston chegarasini noqonuniy kesib o‘tib, “O‘zbekiston islom harakati” terrorchilik tashkiloti safiga borib qo‘shilgan. Amirsaid Bahodirov u yerda jangovar mashg‘ulotlar va harakatlarda ishtirok etgan.

“Sud jarayonida ayblanuvchining ma’lum qilishicha, Afg‘onistonda amalga oshirilgan jangovar harakatlar muvaffaqiyatsizlikka uchragach, u jangarilar guruhi tarkibida Pokistonga o‘tib ketgan”, — deyiladi xabarda. 2013-yilda Bahodirov Afg‘oniston—Pokiston chegarasini kesib o‘tishga uringanida qo‘lga olingan va Afg‘onistonda 4 yil muddatga ozodlikdan mahrum etilgan. Jazo muddati tugagach, u O‘zbekistonning tegishli idoralari qo‘liga topshirilgan.