TIVda Kolumbiya elchisi bilan uchrashuv bo‘lib o‘tdi

2018-yilning 17-aprel kuni O‘zbekiston Respublikasi tashqi ishlar vaziri Abdulaziz Komilov Kolumbiya Respublikasi favqulodda va muxtor elchisi (qarorgohi Moskva shahrida) etib tayinlangan Alfonso Lopes Kabaleroni qabul qildi. Bu haqda TIV matbuot xizmati xabar bermoqda.

Ishonch yorliqlarini topshirish marosimidan so‘ng bo‘lib o‘tgan suhbat chog‘ida ikki mamlakat bir-birlari uchun istiqbolli hamkor ekanligi hamda siyosiy, savdo-iqtisodiy, sarmoyaviy va madaniy-gumanitar sohalardagi aloqalarni rivojlantirishdan manfaatdorligi ta’kidlab o‘tildi.

Uchrashuvda siyosiy maslahatlashuvlarni muntazam o‘tkazish va ishbilarmon doira vakillari o‘rtasidagi aloqalarni faollashtirish bo‘yicha takliflar bildirildi.