O‘zbekistonda me’yoridan ortiq oynalari qoraytirilgan avtomashinalarga qarshi reyd boshlandi

2018-yilning 4-iyun kunidan boshlab butun O‘zbekiston hududi bo‘ylab me’yoridan ortiq oynalari qoraytirilgan avtomashinalarga qarshi reyd boshlandi, deb xabar beradi UzNews.

Xabarda ta’kidlanishicha, ushbu reydlar ichki ishlar vaziri Po‘lat Bobojonovning buyrug‘iga asosan boshlab yuborilgan. Ushbu reyd bo‘yicha berilgan buyruqning og‘zaki yoki yozma shaklda ekanligi to‘g‘risida esa aniq ma’lumot berilmagan.

Eslatib o‘tamiz, Ma’muriy javobgarlik to‘g‘risidagi kodeksining 126-moddasiga asosan, avtomashinalarning yon va orqa tomonlari qoraytirilgan taqdirda, quyosh o‘tkazuvchanligi 70 foizdan kam bo‘lmasligi kerak.

Ma’lumot o‘rnida aytish kerakki, bu kabi qoidabuzarlik eng kam oylik ish haqi miqdoridagi jarimaga sabab bo‘ladi. Bir yil ichida takror sodir etilsa, eng kam ish haqining ikki barobari – 344 480 so‘m.