O‘zbekiston jamoasi Technovation Challenge xalqaro tanlovi final bosqichiga yo‘l oldi

Joriy yilda Technovation Challenge xalqaro tanlovi finalida loyihalarini taqdim etadigan dunyoning eng yaxshi 12 jamoasi orasida O‘zbekiston ham ilk bor ishtirok etadi, deb yozadi O‘zA.

Technovation Challenge xalqaro tanlovi 2010-yildan buyon dunyoning qariyb 80 mamlakatida o‘tkazib kelinmoqda. Ular orasida O‘zbekiston ham bor. O‘zbekistonlik qizlar jamoasi Technovation Challenge tanlovida ikkinchi bor ishtirok etmoqda. Bu yil Technovation Uzbekistan tanlovida 29 jamoa o‘zaro bahslashdi. Ishtirokchilar ekologiya va sog‘liqni saqlash, hayvonlarni himoya qilish, aholining bandlik darajasini oshirish va ijtimoiy qo‘llab-quvvatlash sohalaridagi loyihalarini taqdim etdi.

Technovation Challenge’ning yakuniy bosqichi 2018-yilning 6—10-avgust kunlari Kaliforniyada (AQSh) bo‘lib o‘tadi. Tanlovda har bir yosh toifasida sovrinli o‘rinlar uchun bahs o‘tkaziladi.