Chorvoqda noqonuniy qurilgan hashamatli uylar buziladi

Chorvoqda noqonuniy ravishda qurilgan hashamatli dala hovlilari buziladi. Bu haqda “O‘zbekiston 24” telekanaliga tayanib, “Xalq so‘zi” xabar berdi.

“O‘zbekiston 24” telekanali orqali efirga uzatilgan lavhada Toshkent viloyati Bo‘stonliq tumanida noqonuniy ravishda qurilgan inshootlar ko‘rsatilgan.

Aytilishicha, daryo oldi hududlarida noqonuniy ravishda qurilgan dala hovlilari buzib tashlanadi. Hududda joylashgan ko‘plab inshootlarning xavfsizlik va sanitariya qoidalariga javob bermasligi qayd qilingan.

O‘z navbatida huquq-tartibot organlari noqonuniy qurilish uchun yer bergan mahalliy hokimiyat organlari faoliyatini ham tekshirishi ma’lum qilingan.