Toshkentdagi oziq-ovqat do‘konida yong‘in kelib chiqdi

Toshkentdagi oziq-ovqat do‘konida yong‘in kelib chiqdi, deya Toshkent IIBB matbuot markazi xabar bermoqda.

7-avgustdan 8-avgust kuniga o‘tar kechasi soat 03:30 da Toshkent shahar IIBB YoXB kuch va vositalarni boshqarish va muvofiqlashtirish boshqarmasi markaziga “Erkin market” oziq-ovqat do‘konida yong‘in kelib chiqqani haqida xabar kelib tushgan.

Sergeli tumanida joylashgan do‘konga o‘t o‘chirish guruhi yetib borib, yong‘in soat 04:39 da to‘liq bartaraf etilgan. Dastlabki taxminlarga ko‘ra, elektr tarmog‘idagi qisqa tutashuv yong‘inga sabab bo‘lgan. Jarohatlanganlar va qurbonlar yo‘q.