O‘zbekistondagi eng qimmat kartoshka Gulistonda, eng arzoni esa Qarshida

O‘zbekiston iste’molchilar huquqlarini himoya qilish jamiyatlari federatsiyasi Qoraqalpog‘iston Respublikasi, viloyatlar hamda Toshkent shahri markaziy bozorlarida sotilayotgan oziq-ovqat, nooziq ovqat va qishloq xo‘jalik mahsulotlari narxlarining bugungi kundagi holatini e’lon qildi.

Respublika bozorlarida guruchni 4-13 ming so‘mgacha uchratish mumkin. Qo‘yliq dehqon bozoridagi eng qimmat narxdagi guruch bu haftada ham saqlanib qolgan — 13 ming so‘m. Eng arzon guruch Termiz shahar markaziy dehqon bozorida — 3500 so‘m. Shuningdek, Nukus, Jizzax shahar markaziy dehqon bozorlarida 4 000 ming so‘m.

Mamlakat bozorlarida 1 kilogramm o‘simlik yog‘i 8-12 ming so‘mdan sotilmoqda. Ushbu mahsulotning eng arzonini Nukus shahar markaziy dehqon bozorida uchratish mumkin — 8 ming. Eng qimmat narxlarni Buxoro, Jizzax shaharlari, “Farhod” (Toshkent shahri) dehqon bozorlarida uchratish mumkin — 12 ming so‘m.

Eng arzon un narxi Termiz shahar markaziy dehqon bozorida kuzatildi —1 kilogramm 1-navli un 1500 so‘m. Eng qimmat narxlar esa Jizzax shahar markaziy dehqon bozorida — 3500 so‘m.

Eng qimmat narxlardagi shakar Nukus shahar markaziy dehqon bozori va Yangi shahar bozori (Andijon)da — 1 kilogramm shakar 5 500 so‘m. Eng arzoni esa Navoiy shahri markaziy dehqon bozorida — 4 ming so‘m.

O‘tgan haftada bozorlarda tuxum narxlarining o‘sgani kuzatilgan edi. Bu haftada ko‘plab bozorlardagi tuxum narxlari bir xil 350-500 so‘m. Eng arzon narx Qarshi shahri “Yerqo‘rg‘on” dehqon bozorida — 330 so‘m. Eng qimmat narx “Qo‘yliq” dehqon bozori (Toshkent shahri)da — 400-600 so‘mdan sotilmoqda.

“Yerqo‘rg‘on” dehqon bozoridan 1 kilogramm kartoshkani 500 so‘mdan 1200 so‘mgacha xarid qilish mumkin bo‘lib turgan bir paytda, Guliston shahri markaziy dehqon bozori (Sirdaryo)dan 1 kilogramm kartoshkani 1500 so‘mdan 3000 so‘mgacha sotilmoqda.

Nukus shahar markaziy dehqon bozorida 1 kilogramm pomidor 1000 – 1500 so‘m. “Farhod”, “Qo‘yliq” dehqon bozorilari (Toshkent shahri)da 4000 ming so‘mgacha sotilmoqda.