“ArMI—2018” nihoyasiga yetdi. O‘zbekistonlik harbiylar jami 6 ta sovrinli o‘rinlarga egalik qildi (fotogalereya)

IV Xalqaro armiya o‘yinlari nihoyasiga yetdi. “Harbiy olimpiada” nomini olgan xalqaro musobaqada ikkinchi bor ishtirok etgan o‘zbekistonlik harbiy xizmatchilar 6 ta sovrinli o‘rinlarni egallashga muvaffaq bo‘ldi. Bu haqda Mudofaa vazirligi matbuot xizmati “Daryo”ga ma’lum qildi.

Joriy yilda Xalqaro armiya o‘yinlari 28 yo‘nalish bo‘yicha o‘tkazilgan bo‘lib, unda dunyoning 32 mamlakatidan kelgan harbiylar ishtirok etdi.

O‘tgan yili 8 ta yo‘nalishda qatnashib, 5 ta sovrinli o‘ringa ega chiqqan Mudofaa vazirligi harbiy xizmatchilari, bu safar 12 yo‘nalishda qatnashdi.

Xususan, 200 nafardan ortiq O‘zbekiston harbiy xizmatchilari “Artilleriya o‘t ochish ustalari” (2-o‘rin), “Qo‘shin razvedkasi a’lochilari” (3-o‘rin), “Yo‘l patruli” (3-o‘rin), “Harbiy ralli” (3-o‘rin), “Qurolsoz usta” (3-o‘rin), “Xavfsiz marshrut” (3-o‘rin), “Sodiq do‘st”, “Harbiy-tibbiy estafeta”, “Elbrus halqasi”, “Merganlik marrasi”, “Musaffo osmon”, “Dala oshxonasi” tanlovlarida xorijiy armiyalarning eng sara vakillariga munosib qarshilik ko‘rsatdi.

Shuningdek, “Harbiy-tibbiy estafeta” bellashuvida ishtirok etgan o‘zbekistonlik harbiy xizmatchi, Mudofaa vazirligi Markaziy harbiy poliklinika terapevt-shifokori, tibbiy xizmat kapitani Larisa Xolmamatova harbiy shifokorlar o‘rtasida o‘tkazilayotgan “Maxsus ko‘nikmalar” shartida ikkinchi o‘ringa loyiq topildi.

“Qo‘shin razvedkasi a’lochilari” tanlovida ishtirok etgan o‘zbekistonlik qo‘shin razvedkachilari 3,3 soniya ko‘rsatkich bilan amaldagi me’yordan ikki barobar tezroq vaqt ichida guruh tarkibida gazniqoblarni kiyish sinovini bajardi.

“Xavfsiz marshrut” bellashuvida ishtirok etgan serjant Shermat Davronov birinchi urinishdayoq piyodalarning harakatini cheklashga mo‘ljallangan minani aniqlab, uni zararsizlantirishga muvaffaq bo‘lgani uchun hakamlar tomonidan “O‘z ishining ustasi” nominsiyasiga loyiq deb topildi.

“Merganlik marrasi” yo‘nalishining final estafetasida tanlovdan tashqari ishtirok etgan o‘zbekistonlik harbiylar barcha jamoalardan oldinga o‘tib, 10 daqiqayu 57 soniyada rekord natijani qayd etdi. 4-bosqich — “Merganlar dueli”da qatnashgan oddiy askar S.Rabimov 2-o‘rinni egallab, esdalik mukofoti bilan taqdirlandi.

Bundan tashqari Moskva viloyatining Dmitrov shahrida o‘tkazilgan kinologiya xizmati itlari o‘rtasidagi “Sodiq do‘st” tanlovnining 300 metrli to‘siqlar yo‘lagidan o‘tishda O‘zbekiston Mudofaa vazirligi Markaziy xizmat itlari pitomnigi harbiy xizmatchisi Shokir Jo‘rayevning “Gita” laqabli xizmat iti 1 daqiqayu 15 soniya natija bilan rekord o‘rnatdi.

Ta’kidlash kerakki, o‘zbekistonlik harbiy xizmatchilar umumjamoa hisobida “ArMI—2018”ning 32 ishtirokchi-mamlakat o‘rtasida oltinchi o‘rinni egalladi.

Shu bilan birga Moskvada “ArMI—2018” doirasida o‘zbek milliy hunarmandchiligi namunalari ko‘rgazmasi ham tashkil etildi. Tashrif buyuruvchilar o‘zbek milliy hunarmandchiligi mahsulotlarini yuqori baholadi va, albatta, kelajakda O‘zbekistonga tashrif buyurish ishtiyoqida ekanligini bildirdi.