O‘zbekiston Moliya vazirligining logotip yaratish bo‘yicha tanlovi durang bilan yakunlandi

Moliya vazirligining yangi logotip yaratish bo‘yicha tanlovi durang bilan yakunlandi, deb yozadi Spot. Muassasa ma’lum qilishicha, tanlovga 100 dan ortiq ishlar kelib tushgan, ularning 15 tasi ikkinchi bosqichda qatnashish uchun tanlab olingan.

“Afsuski, ijodiylik bilan ajralib turuvchi, muayyan xarakter va uslubga ega bo‘lgan, vazirlik faoliyatini aks ettiruvchi ishlar topilmadi”, — deyiladi xabarda.

Tanlov yakunlariga ko‘ra, tashkilotchilar yangi logotip ishlab chiqish vazifasini professional dizaynerlarga topshirishga qaror qildi.

Eslatib o‘tamiz, O‘zbekiston Moliya vazirligining zamonaviy va original logotipini yaratish uchun professional grafik dizaynerlar, rassomlar hamda rassomlik mahoratiga ega bo‘lgan kreativ shaxslar uchun tanlov e’lon qilingan edi.