16 nafar o‘zbekistonlik Rossiya fuqaroligini qo‘lga kiritdi

Rossiya prezidenti Vladimir Putin imzolagan farmonga muvofiq, 104 kishi Rossiya fuqaroligini qo‘lga kiritdi, deb yozadi Sputnik.

Ular orasida 16 nafar o‘zbekistonlik, 14 moldovalik, 11 armanistonlik, 10 nafardan belaruslik va tojikistonlik, 9 ozarbayjonlik, besh nafardan ukrainalik, afg‘onistonlik va vyetnamlik, uch nafardan gruziyalik va qozog‘istonlik, ikki nafardan fransiyalik, turkiyalik va isroillik, bir nafardan kiprlik, hindistonlik, italiyalik, AQShlik va germaniyalik bor. Rossiya fuqaroligiga, bundan tashqari, RF hududida tug‘ilgan ikki kishi ham ega bo‘ldi.

Farmonga ko‘ra, ushbu shaxslar Rossiya fuqarosi qasamyodini qabul qilgan kundan fuqarolikka ega bo‘ladi, voyaga yetmaganlar bundan istisno — bolalar ota-onalari qasamyod qabul qilgan vaqtda ular bilan birgalikda fuqarolikka kiradi.