O‘zbekistonda ichki ishlar xodimlariga davlat mukofotlari topshirildi

Prezident farmoni bilan Mustaqillikning 27 yilligi arafasida 12 nafar ichki ishlar xodimi mamlakatda jamoat xavfsizligi, tinchlik va barqarorlikni ta’minlash borasidagi ko‘p yillik fidokorona mehnati, xizmat burchini bajarish va milliy manfaatlarni himoya qilishda mardlik va jasorat ko‘rsatgani hamda yosh avlodni Vatanga sadoqat ruhida tarbiyalashga qo‘shgan munosib hissasi uchun davlat mukofotiga sazovor bo‘ldi. Ichki ishlar vazirligida ana shu mukofotlar o‘z egalariga tantanali topshirildi, deb yozadi O‘zA.

Tadbirda ichki ishlar vaziri P.Bobojonov mamlakatda qonun ustuvorligini ta’minlash, aholi manfaatlarini himoya qilish, huquqiy madaniyatni yuksaltirish, huquqbuzarliklarning oldini olish, diniy ekstremizmga qarshi kurashish ichki ishlar organlari xodimlarining eng asosiy vazifasi ekani, shuning uchun yurt tinchligini asrashda doimo hushyor va ogoh bo‘lish kerakligini ta’kidladi.

Davlat rahbarining joriy yil 23-avgustdagi “Ichki ishlar organlari boshqaruv, nazorat va shaxsiy tarkib bilan ishlashning samarali tizimini joriy etish bo‘yicha chora-tadbirlar to‘g‘risida”gi qarori soha rivojida muhim ahamiyat kasb etishi qayd etildi.

Bugungi kunda ichki ishlar xodimlari tomonidan aholi, ayniqsa, yoshlarni turli illatlardan himoya qilish, terrorizm, ekstremizm, odam savdosi kabi jinoyatlarning oldini olish, tinchlik va barqarorlikni mustahkamlash borasida tizimli ishlar amalga oshirilmoqda.

– Mamlakat tinchligi va xavfsizligini ta’minlash ishiga hissa qo‘shayotganimdan faxrlanaman, – deydi O‘zbekiston Respublikasi Ichki ishlar vazirligi akademiyasi tezkor-qidiruv faoliyati kafedrasi boshlig‘i, II darajali “Shon-sharaf” ordeni sohibi Abduvali Hamdamov. – Bu ishonchni oqlash, xalqimiz tinchligi va farovonligi, farzandlarimiz kelajagini himoya qilish uchun bor kuchimni sarflayman.

Ichki ishlar vazirligining buyrug‘iga ko‘ra, bir guruh ichki ishlar xodimlariga polkovnik unvoni ham berildi, “A’lo xizmatlari uchun” ko‘krak nishoni, faxriy yorliq, esdalik sovg‘alari va pul mukofoti bilan taqdirlandi.