Farg‘onada Birinchi Prezident hayoti va faoliyatiga bag‘ishlangan fotoko‘rgazma tashkil etildi

Islom Karimov fondi Farg‘ona viloyati tarixi va madaniyati davlat muzeyida Birinchi Prezident hayoti va faoliyatiga bag‘ishlangan fotoko‘rgazma tashkil etdi.

Ko‘rgazmaga Islom Karimov hayotining turli davrlarida olingan suratlar qo‘yilgan. Ular orasida ish jarayonidagi va oilaviy fotolar bor.

— O‘quv yilining dastlabki kunlaridanoq muzeylarda viloyat umuta’lim maktablari, kollejlar, akademik litsey o‘quvchilari, oliy o‘quv yurtlar talabalari uchun mustaqillik darslari o‘tiladi. Islom Karimovga bag‘ishlangan ushbu ko‘rgazma esa ularning bilimini yanada mustahkamlaydi, — deydi muzey direktori Bahodir Hoshimov.

Fotoko‘rgazma 27-sentabrigacha davom etadi.