Krishtianu Ronaldu Chempionlar Ligasining bitta o‘yinini o‘tkazib yuboradigan bo‘ldi

UEFA “Yuventus” hujumchisi Krishtianu Ronalduning Yevropa Chempionlar Ligasi 1-turida “Valensiya”ga qarshi uchrashuvdagi chetlatilishi bilan bog‘liq yakuniy qarorni e’lon qildi.

Unga ko‘ra Ronaldu avtomatik ravishda 2-turdan o‘rin olgan “Yang Boyz” jamoasiga qarshi bahsni o‘tkazib yuboradi. Shu tariqa 33 yoshli hujumchiga boshqa qo‘shib jazo tayinlanmaydigan bo‘ldi. Endi u 3-turda sobiq jamoasi “Manchester Yunayted”ga qarshi bahsda maydonga tushishi mumkin bo‘ladi.

Eslatib o‘tamiz, “Valensiya”ga qarshi o‘yinning 29-daqiqasida Ronaldu raqib himoyachisi Jeyson Murilyoning sochiga tegib qo‘yganligi sabab uchrashuv bosh hakami Feliks Brix tomonidan qizil kartochka bilan jazolangandi.