O‘z hayoti haqida YouTube-kanali orqali hikoya qiladigan Indoneziya prezidenti (video)
Indoneziya prezidenti Joko Vidodo o‘z hayoti haqida videobloglar yordamida hikoya qilishni afzal biladi, deb yozadi TJournal.
Chunonchi, 1-mart kuni mamlakat yetakchisi o‘z YouTube-kanaliga Saudiya Arabistoni qiroli Salmon ibn Abdulaziz Al Saudni prezident saroyida qabul qilib olgani aks etgan videoni joyladi.
Bunday videolar uchun u #JKWVLOG xeshtegidan foydalanadi, shu tariqa ular kanalda e’lon qilinadigan boshqa televizion reportajlar va rasmiy videolardan ajralib turadi.
Indoneziya prezidenti o‘z videolarini unchalik ham tez-tez e’lon qilmaydi. Fevral boshida u futbol bo‘yicha Prezident Kubogi tribunalarida olingan videoni joylagan edi.
Shuningdek, o‘sha vaqtda prezident vazirlar bilan ko‘cha yemakxonalaridan birida tamaddi qilgani aks etgan videoni bo‘lishgan edi.
2016-yil sentabrida esa Vidodo kamondan o‘q otishni o‘rganayotgani haqida gapirib bergan va fuqarolarning savollariga javob qilgan edi.
2016-yil avgustida Indoneziya Mustaqillik kunini nishonlash chog‘ida prezidentning YouTube-kanalida tadbirning keng formatdagi to‘g‘ridan-to‘g‘ri translyatsiyasi bo‘lib o‘tgandi.
Ilk marotaba Indoneziya prezidenti YouTube’da o‘zining 22 yoshli o‘g‘lining kanalida paydo bo‘lgan edi. Rolikda ular armrestling jangini o‘tkazgandi.
Vidodo Twitter va Instagram’dan ham faol foydalanadi, u yerdagi obunachilarining umumiy soni o‘n milliondan oshadi.