Toshkentda o‘zbek milliy nonushtasi taqdim etildi (foto)

O‘zbekiston Oshpazlar uyushmasida o‘zbek milliy nonushtasi standarti taqdimoti bo‘lib o‘tdi, deb yozadi “Podrobno.uz”.

So‘zga chiqqan O‘zbekiston Oshpazlar uyushmasi raisi Akbar Umarovning aytishicha, butun dunyoda ingliz nonushtasi keng tanilgan, ammo xilma-xillikka boy va sog‘liq uchun foydali bo‘lgan o‘zbek milliy nonushtasi bilan deyarli hech kim tanish emas.

“Ushbu anglashilmovchilikni tuzatib, butun dunyoga O‘zbekistondagi nonushta uchun taomlarni taqdim etish vaqti keldi”, — dedi u.

O‘zbek milliy nonushtasi standartiga sutli taomlar — shirguruch, shirqovoq va sutli atala, nonlarning xilma-xil turlari, somsa, qatlama, shuningdek, meva va sabzavotlar, shirinliklar va quruq mevalar, shu jumladan, asal, murabbo va sumalak kirdi. Standart ichimliklardan shirchoyni o‘z ichiga oldi.