2019-yilda Haj safari o‘tgan yilga nisbatan 10 mln so‘mga arzonlashdi

2018-yilda O‘zbekiston fuqarolari uchun Haj ziyoratini amalga oshirish xarajatlari 38 million so‘mni tashkil etgan edi. 2019-yildan Saudiya Arabistonida barcha xizmatlarga 5 foizlik qo‘shilgan qiymat solig‘i va mehmonxonalarga 2,5 foizlik soliq kiritildi. Shunga ko‘ra bu yil haj ziyorati sarf-xarajatlari taxminan 42-43 million so‘m bo‘lishi kutilayotgan edi. Bu haqda Din ishlari bo‘yicha qo‘mita matbuot xizmati xabarida aytiladi.

Joriy yildan fuqarolarimiz haj safari xarajatlari 33,3 million so‘mgacha tushirildi, ya’ni haj ibodatini amalga oshirishni 10 million so‘mga arzonlashtirishga erishildi. “Haj-2019” mavsumidan so‘ng umra safari 1,3 millionga arzonlashtirildi. Shuningdek, “Haj-2018” to‘lovidan ortgan 926,5 ming so‘m miqdoridagi mablag‘ har bir ziyoratchiga qaytarib berildi.