AQSh Venesuela qirg‘oqlariga o‘z kemalarini yuboradi

AQSh Venesueladagi siyosiy inqiroz sabab u yerga harbiy-tibbiy kemani yuborish niyatida. Bu haqda Amerika hukumatiga tayanib, Reuters xabar berdi.

AQSh vitse-prezidenti Mayk Pensning ma’lum qilishicha, Comfort kemasi mamlakatda tibbiy yordamga muhtoj barchaga ko‘mak berish uchun yuboriladi.

“Prezident Donald Trampning topshirig‘iga ko‘ra, iyun oyida AQSh Harbiy-dengiz kuchlari Karib dengizi, Markaziy va Janubiy Amerika hududlariga yo‘naltiriladi”, — deydi siyosatchi.

Pensning qayd etishicha, kema venesuelalik qochoqlarga tibbiy yordam ko‘rsatish bilan shug‘ullanadi.

2018-yilda AQSh Janubiy Amerikaga tibbiy kemani yuborgan edi. O‘shanda kema Gonduras, Ekvador, Peru va Kolumbiyada to‘xtab, aholiga yordam ko‘rsatgan.