Rossiya Mudofaa vazirligi: bir oylik murakkab muzokaralardan so‘ng jangarilar Xomsni tark etmoqda

Jangarilarning Suriyaning Xoms shahri shimoliy qismini tark etishi bo‘yicha muzokaralar murakkab ruhda bir oyga yaqin davom etdi. Muzokara jarayonlarida Rossiyaning Suriyadagi bir-biriga dushman tomonlarni yarashtirish markazi ofitserlari katta rol o‘ynadi. Bu haqda Markaz rahbari general-leytenant Aleksey Kim ma’lum qildi, deb yozadi “TASS”.

Avvalroq 18-mart, shanba kuni Xoms shimolidagi (Damashqdan 165 kilometr masofada) El-Vayerdan qurolli tuzilmalarni chiqarib ketish boshlanganligi ma’lum qilingan edi.

Markaz rahbarining so‘zlariga qaraganda, shahardan 400 jangari, shuningdek, ularning oila a’zolaridan iborat birinchi guruh chiqarib ketilgan.

Bir necha yuz jangari Suriya prezidenti Bashar Asad tomonidan e’lon qilingan amnistiya doirasida xalq ko‘ngilli askarlari safiga qo‘shiladi yoki Suriya politsiyasi safini to‘ldiradi.