17—21-aprel kunlari Dushanbeda O‘zbekiston sanoat mahsulotlarining yarmarkasi bo‘lib o‘tadi

2017-yil 17—21-aprel kunlari Tojikiston poytaxti Dushanbe shahridagi “Poytaxt-90” savdo markazida O‘zbekiston Respublikasi sanoat korxonalari mahsulotlarining birinchi ko‘rgazmali yarmarkasi bo‘lib o‘tadi. Bu haqda Tojikiston Respublikasi Savdo-sanoat palatasi matbuot xizmati xabar berdi.

Ko‘rgazma-yarmarka Tojikiston hamda O‘zbekiston hukumatlari, Tashqi iqtisodiy aloqalar, investitsiya va savdo vazirligi ko‘magi ostida bo‘lib o‘tadi.

Tojikiston Respublikasi Savdo-sanoat palatasi, O‘zbekiston Respublikasi Savdo-sanoat palatasi va “O‘zekspomarkaz” Milliy ko‘rgazma kompaniyasi yarmarka tashkilotchilaridir.

Ko‘rgazma-yarmarkaning maqsadi O‘zbekiston hamda Tojikiston hukumatlararo komissiyasining IV majlisi yakunlari bo‘yicha erishilgan kelishuvlar — tenglik tamoyillariga asoslangan va o‘zaro manfaatli savdo-iqtisodiy hamda ilmiy-texnik aloqalarni rivojlantirish va mustahkamlash, investitsiyalar, texnika xa texnologiyalarni jalb qilishni rag‘batlantirish, qo‘shma korxonalarni tashkil qilish, sheriklar topishni amalga oshirishdan iborat. “Daryo”ning Telegram’dagi rasmiy kanali — @toshqindaryo’ga a’zo bo‘ling!