A Seriya. “Yuventus” safarda Ronaldusiz g‘alabaga erishdi (video)
Futbol bo‘yicha Italiya A Seriyasining 5-turi doirasida 24-sentabr, seshanba kuni 2 ta o‘yin yakunlandi.
Mauritsio Sarri boshqaruvidagi Turinning “Yuventus” klubi safarda “Breshiya”ni sinovdan o‘tkazdi.
Bellashuvning 4-daqiqasidayoq mezbon jamoa hujumchisi Alfredo Donnarumma hisobni ochgan bo‘lsa, 40-daqiqaga kelib “Breshiya” himoyachisi Jon Chanselyor avtogol muallifiga aylandi (1:1). 63-daqiqada esa Turin klubi yarim himoyachisi Miralem Pyanich jamoasini hisobda oldinga olib chiqdi.
Shu tariqa “Yuventus” mehmonda kechgan bahsda “Breshiya” ustidan 2:1 hisobida g‘alaba qozondi va 3 ochkoni qo‘lga kiritdi.
Ushbu g‘alabadan so‘ng turinliklar 13 ochko jamg‘argan holda musobaqa jadvalida peshqadamga aylandi. “Breshiya” esa 6 ochko bilan 12-o‘rinda bormoqda.
A Seriya
5-tur bahslari
24-sentabr, seshanba
Gollar: 1:0 — 4 Donnarumma, 1:1 — 40, avtogol Chanselyor, 1:2 — 63 Pyanich
“Breshiya”: Yoronen, Chanselyor, Sabelli, Mateyu (Martella, 70), Chistana, Dessena, Tonali, Romulo (Ayye, 85), Bizoli, Donnarumma (Matri, 64), Balotelli.
“Yuventus”: Shchensni, Aleks Sandro, Danilo (Kuadrado, 19), de Ligt, Bonuchchi, Rabyo, Pyanich, Hedira, Remzi (Bernardeski, 69), Iguain, Dibala (Matyuidi, 80)
Ogohlantirishlar: Hedira (7), Bonuchchi (41), de Ligt (56), Chistana (79)
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Manba: Daryo.uz