O‘zbekistonda “Qizil kitob”ga kiritilgan oqqushni o‘ldirgan shaxs qidirilmoqda

26—27-noyabr kunlari ijtimoiy tarmoqlarda, xususan, Instagram’da foydalanuvchi “gafurovskiy.95” tomonidan fotosurat e’lon qilindi, deb xabar beradi Ekologiya va atrof-muhitni muhofaza qilish qo‘mitasi matbuot xizmati.

Fotosuratda yosh yigit o‘ldirilgan tulki va vishildoq oqqushni qo‘lida ushlab turgani, yerda esa uchta kaptar va quyon yotganini ko‘rish mumkin.

“Suratga ko‘ra, barcha hayvonlar va qushlar o‘ldirilgan. Shuni ta’kidlash kerakki, vishildoq oqqush ham O‘zbekiston “Qizil kitobi”ga, ham Xalqaro “Qizil kitob”ga kiritilgan”, — deyiladi xabarda.

Hisob-kitoblarga ko‘ra, hayvonot olamiga yetkazilgan umumiy zarar 12 million so‘mdan oshadi.

“Suratdagi yigitning shaxsini aniqlash va qonun hujjatlarida belgilangan tartibda tegishli choralar ko‘rish uchun barcha mavjud ma’lumotlar, shu jumladan, ijtimoiy tarmoqlarda e’lon qilingan fotosurat Ichki ishlar vazirligi va Bosh prokuraturaga yuborildi.

Ushbu holat Ekologiya va atrof-muhitni muhofaza qilish qo‘mitasi nazorati ostiga olingan. Keyingi barcha ma’lumotlar qo‘mitaning rasmiy veb-saytida e’lon qilinishi aytiladi”, — deyiladi xabarda.