Energetika vazirligi 1-fevraldan muddati o‘tgan elektr hisoblagichlar ham me’yor hisobiga olinishini inkor qildi

Ijtimoiy tarmoqlarda “01.02.2020-yil kunidan boshlab xonadonlarning elektr hisoblagichlarini davlat qiyoslash dalolatnomasi bo‘lmagan holda me’yor hisobida olinadi” degan mazmundagi e’lon tarqatila boshlandi. Energetika vazirligi ushbu holat yuzasidan shuni bayonot bilan chiqdi.

Bu noto‘g‘ri xabar bo‘lib, bu kabi tasdiqlanmagan xabarlarga e’tibor bermasligingizni, shuningdek, agar shunaqa holatlar kuzatilganda zudlik bilan huquqni muhofaza qiluvchi organlarga murojaat qilishingizni so‘raymiz.

Alohida takidlaymizki, Vazirlar Mahkamasining 2018-yil 12-yanvardagi “Elektr energiyasi va tabiiy gazdan foydalanish tartibini takomillashtirishga doir qo‘shimcha chora-tadbirlar to‘g‘risida”gi 22-sonli qarorida maishiy iste’molchilarga elektr energiyasi hisoblagichlarini sotib olish, o‘rnatish, ro‘yxatga olish, davriy davlat qiyoslovidan o‘tkazish va plombalash hududiy elektr tarmoqlari korxonasi mablag‘lari hisobidan bepul amalga oshiriladi. Shuningdek, jarimaga ham tortilmaydi, — deyiladi Energetika vazirligi matbuot kotibining bayonotida.