Bashar Asad Suriyaga Rossiya yer usti qo‘shinlarini olib kirishga zarurat yo‘qligini aytdi

Suriya prezidenti Bashar Asadning fikricha, Rossiya yer usti qo‘shinlarini mamlakat hududiga olib kirishga ehtiyoj yo‘q. Bu haqda u “RIA Novosti” agentligiga bergan intervyusida ma’lum qildi, deb xabar bermoqda “Gazeta.ru”.

Uning aytishicha, Rossiya havo-kosmik kuchlari Suriyada yaxshi samaradorlik ko‘rsatdi, shu bois boshqa turdagi qo‘shinlarga hozircha zarurat yo‘q.

“Balki kelajakda, agar dushmanlarimiz va ularning tarafdorlari, ularning terrorchilari o‘z strategiyasini o‘zgartirib, butun dunyodan ko‘proq miqdorda terrorchilarni olib kirsa, u paytda butun boshli terrorchilar armiyalari shakllansa, balki o‘shanda kerak bo‘lar, hozircha bu zarur deb o‘ylamayman”, — ta’kidladi Suriyaning amaldagi rahbari.