“Real” hujumchisi Mariano Dias koronavirusga chalindi

“Real” hujumchisi Mariano Diasda koronavirus aniqlandi. Bu haqda madridliklar klubi rasmiy saytida ma’lum qilindi.

Futbolchining koronavirusga topshirgan testi ijobiy natija bergan, hozirda u o‘z uyida izolyatsiyaga olingan va mashg‘ulotlarga kelmayapti. U bilan muloqotda bo‘lgan sheriklarining izolyatsiyaga olingan yoki olinmagani haqida ma’lumot yo‘q.

Ta’kidlanishicha, futbolchi o‘zini yaxshi his qilmoqda.

O‘tgan haftada Ispaniyada COVID-19 infeksiyasining yangi to‘lqini yuzaga keldi. Ko‘plab hududlar, xususan, Madridda ham karantin qoidalari kuchaytirilgan.

Shu tariqa Mariano “Manchester Siti”ga qarshi kechadigan Chempionlar Ligasi 1/8 final javob bahsida jamoasiga yordam bera olmaydi. Uchrashuv 7-avgust kuni Manchesterda bo‘lib o‘tadi. Madriddagi o‘yinda inglizlar 2:1 hisobida g‘alaba qozongandi.

Mariano Dias joriy mavsum “Real” safida 7 ta o‘yin o‘tkazib, bitta gol muallifiga aylangan.

“Real Madrid” ijrosidagi super qarshi hujumlar orqali kiritilgan top-10 golni tomosha qiling (video)

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!