Braziliyada koronavirusning 100 ming qurboni sharafiga uch kunlik motam e’lon qilindi

Braziliya Oliy sudi mamlakatda koronavirus infeksiyasi asoratlaridan vafot etgan 100 ming kishining xotirasi uchun uch kunlik motam e’lon qildi. Bu haqda sud saytida axborot berilgan.

“Braziliyaliklarning dardiga hamdardlik belgisi sifatida va koronavirusdan vafot etgan 100 ming kishining har biri sharafiga Oliy sud uch kunlik rasmiy motam haqida qaror chiqardi”, — deyiladi axborotda.

Sud axborotida alohida ta’kidlanishicha, bu kabi fojia Braziliya tarixida bo‘lgan emas.

Avvalroq Braziliya Sog‘liqni saqlash vazirligi so‘nggi 24 soat ichida mamlakatda koronavirus qurbonlari soni 905 kishiga ko‘payib, 100 477 nafarga yetganini ma’lum qilgan edi. Jami kasallanish holatlari soni esa 3 milliondan oshgan.

AQShdagi Jons Hopkins universiteti ma’lumotlariga ko‘ra, Braziliya koronavirus bemorlari va qurbonlari soni bo‘yicha jahonda yetakchilardan biri sanaladi — u bu borada faqat AQShdan ortda qolgan holda, dunyoda ikkinchi.

Qayd etish joiz, AQShda koronavirusga chalinganlar soni 5 million kishidan oshgan.