O‘zbekiston Hisob palatasi raisiga yangi o‘rinbosarlar tayinlandi

O‘zbekiston Hisob palatasi raisiga ikki nafar yangi o‘rinbosar tayinlandi. Bu haqda palata tomonidan xabar berildi.

O‘zbekiston Prezidentining 2020-yil 15-sentabrdagi farmoni bilan Bahodir Turobov Hisob palatasi raisining birinchi o‘rinbosari lavozimiga tayinlandi.

Bahodir Turobov 1972-yil Surxondaryo viloyatida tug‘ilgan. U 1994-yil Toshkent moliya institutini iqtisodchi mutaxassisligi, 2000-yil Bank-moliya akademiyasini moliya mutaxassisligi bo‘yicha tamomlagan. 2007-yilda iqtisod fanlari nomzodi ilmiy darajasini olgan.

Bahodir Turabov 2011—2015-yillarda Moliya vazirligi boshqarma boshlig‘i, bosh boshqarma boshlig‘i vazifasida mehnat qilgan. U 2015—2017-yillarda “O‘zpaxtasanoateksport” xolding kompaniyasi bosh boshqarma boshlig‘i lavozimida faoliyat olib borgan. 2017—2018-yillarda Hisob palatasi bosh inspektori, sho‘ba mudiri sifatida mehnat qilgan. 2018—2019-yillarda Davlat soliq qo‘mitasida rais o‘rinbosari vazifasida ishlagan. 2019-yil sentabrdan mazkur tayinlovga qadar Hisob palatasi raisi o‘rinbosari lavozimida ishlab kelgan.

Shuningdek, Prezidentining yuqorida qayd etilgan farmoni bilan Saidlaziz Saidkarimov Hisob palatasi raisi o‘rinbosari lavozimiga tayinlandi.

Saidlaziz Saidkarimov 1982-yil Toshkent viloyatida tug‘ilgan. U 2002-yil O‘zbekiston Milliy universitetini huquqshunoslik mutaxassisligi bo‘yicha tamomlagan. Saidlaziz Saidkarimov 2002—2009-yillarda Sirdaryo viloyati prokuraturasi tizimida turli vazifalarda ishlagan. 2009—2018-yillarda O‘zbekiston Bosh prokuraturasining boshqarma prokurori, katta prokurori, boshqarma boshlig‘i o‘rinbosari, boshqarma boshlig‘i lavozimlarida faoliyat olib borgan. 2018-yil fevraldan mazkur tayinlovga qadar O‘zbekiston Bosh prokurorining o‘rinbosari lavozimida ishlab kelgan.

Avvalroq O‘zbekiston Hisob palatasi shu’ba mudiri Hikmatillo Latipov Andijon viloyati Jalaquduq tumaniga hokim etib tayinlangandi.