29 yoshli murabbiy “Xoffenxaym” klubini tarixda ilk bor Chempionlar ligasiga olib chiqdi

Germaniyaning “Xoffenxaym” klubi kelasi mavsum o‘z tarixida ilk bor Yevropa Chempionlar ligasi musobaqasida ishtirok etadi.

Bundesliganing 31-turida 29 yoshli mutaxassis Yulian Nagelsmann boshqarayotgan klub minimal hisobda zafar quchdi. Yagona gol o‘yinning so‘nggi daqiqasida kiritildi.

Eslatma. Nagelsmann 2016-yil yakunlariga ko‘ra Germaniyada yil murabbiyi sifatida tan olingandi.

Shu tariqa “Xoffenxaym” 5-o‘rinni egallab turgan “Gerta”dan 12 ochkoga o‘zib ketdi. Mavsum yakuniga qadar “Gerta” kuchli to‘rtlikka kira olmasligi oydinlashdi.

G‘alaba “Xoffenxaym”ni 3-o‘ringa olib chiqdi. Bu Chempionlar ligasiga to‘g‘ridan-to‘g‘ri yo‘llanma deganidir. Chempionat so‘nggiga qadar jamoa Dortmund “Borussiya”si bilan mana shu pog‘ona uchun raqobatda bo‘ladi. Ehtimoliy 4-o‘rin Chempionlar ligasining pley-offiga yo‘llanma beradi.

Eslatma. Avvalroq “Leypsig” o‘z tarixida ilk bor Chempionlar ligasida to‘p surish huquqini qo‘lga kiritgan bo‘lsa, “Bavariya” Bundesliga tarixida ilk bor ketma-ket beshinchi marta mamlakat chempioniga aylangandi.

Germaniya Bundesligasi
31-tur o‘yini
30-aprel, yakshanba

Gol: Benjamin Xyubner, 90 (1:0).