Fransiyada boshpanasiz erkak besh yulduzli mehmonxonada to‘rt kun yashadi

Fransiya politsiyasi Bordodagi besh yulduzli mehmonxonada to‘rt kun yashashga muvaffaq bo‘lgan va 2 ming yevro qarz bo‘lib qolgan boshpanasiz erkakni qo‘lga oldi, deb yozadi “RIA Novosti”.

61 yoshli erkak so‘roq chog‘ida ma’lum qilishicha, u “o‘zi uchun yoqimli ish qilib, ko‘chada tunamaslikka qaror qilgan”. Uysiz odam Bordodagi Grand H?tel mehmonxonasida to‘rt kecha uxlagan, xizmatlar uchun hisob 2079 yevroni tashkil qilgan.

Boshpanasiz erkak pulini to‘lamasdan turib mehmonxonani tark etmoqchi bo‘lganida mehmonxona xodimlari politsiya chaqirgan. U shaxsiy buyumlarini o‘g‘irlatib qo‘ygani uchun naqd puli yo‘qligini aytgan. U pulni bank orqali ko‘chirib berishga va’da bergan.

Gumonlanuvchi firibgarlik haqidagi ish bo‘yicha sud qilinadi.

“Daryo” yangiliklarini “Odnoklassniki”da kuzatib boring