“Lokomotiv” Jaloliddin Masharipovni, xitoyliklar Yegor Krimesni “Paxtakor”ga qaytarishga yaqin

Toshkentning “Paxtakor” klubi Jaloliddin Masharipov hamda Yegor Krimesni ortga qaytarishni maqsad qilgan. Bu haqda “Championat.asia” nashri ma’lumot berdi.

Yangi rahbariyat klub bilan shartnomasi bor bo‘lgan bu ikki futbolchini qaytarish orqali tarkibdagi muammolarni qisman hal qilishni niyat qilgan.

Mavsum boshida “Lokomotiv” Osiyo Chempionlar ligasida muvaffaqiyatli ishtirok etish uchun Jaloliddin Masharipovni ijaraga olgandi. Biroq guruh bosqichida bor-yo‘g‘i 5 ochko to‘plagan “temiryo‘lchilar” so‘nggi o‘rindan joy oldi. Shundan kelib chiqilsa, ikkinchi davra boshida Masharipov “Paxtakor”ga qaytishi katta ehtimol.

Yegor Krimes esa Xitoydagi legionerlar cheklovi sabab o‘yin amaliyotiga ega bo‘lmayapti. Shundan kelib chiqib, “Paxtakor” uni ham Toshkentga qaytarishga yaqin. Shuningdek, o‘tgan mavsumdan buyon “Qo‘qon—1912” safida yurgan Javohir Sidiqov ham sobiq klubiga qaytishi mumkin.

Avvalroq “Paxtakor” stadioni rekonstruksiya qilinishi mumkinligi va klubga Braziliya yoki Yevropadan murabbiy olib kelinishi borasida tasdiqlanmagan xabarlar paydo bo‘lgandi.

“Daryo”ning YouTube’dagi rasmiy sahifasiga obuna bo‘ling