Misrda 13 kishi o‘lim jazosiga mahkum etildi

Misrda jinoiy sud “Misr legioni tashkilotlari” ishi bo‘yicha 13 ayblanuvchini o‘lim jazosiga mahkum etdi, deb yozadi “Korrespondent.net”.

“Misrdagi Giza jinoyat sudi 8-oktabr, yakshanba kuni ‘Misr legioni tashkilotlari’ ishi bo‘yicha 13 ayblanuvchini hukm ijrosi haqida yuridik xulosa berishi uchun muftiyga yo‘naltirish haqida qaror qabul qildi”, — deyiladi xabarda.

O‘lim jazosi hukmi tasdiqlash uchun muftiylar kengashiga yo‘naltirildi. Jangarilar ishi bo‘yicha yakuniy hukm sud tomonidan 2017-yil 7-dekabrda chiqariladi.

Ushbu ish bo‘yicha yana 44 kishiga nisbatan ayblovlar e’lon qilingan. 2013-yildan 2015-yil mayigacha bo‘lgan davrda gumonlanuvchilar Giza va Qohira shaharlarida qator hujumlarni amalga oshirgan. Bundan tashqari, ular Giza milliy xavfsizlik direktorini, shuningdek, politsiya generali va ofitserini o‘ldirgan.

“Daryo” yangiliklarini Facebook’da kuzatib boring