Saudiya Arabistonida korrupsiyada gumondor yana bir necha kishi qo‘lga olindi

Saudiya Arabistoni rasmiylari qirol Salmon bin Abdulaziz as-Saud e’lon qilgan korrupsiyaga qarshi kampaniya doirasida yana bir necha kishini hibsga oldi. Bu haqda Reuters manbalariga tayangan holda “TASS” xabar bermoqda.

Oldinroq kampaniya doirasida 11 shahzoda va to‘rt vazir, shuningdek, kichikroq martabadagi yana bir necha kishi ushlangan edi. Ular orasida mamlakatning eng boy insonlaridan biri, shahzoda al-Valid bin Talal bor edi.

Aytilishicha, hibsga olinganlarning bir qismi sobiq valiahd shahzoda Sulton bin Abdulaziz as-Saud oilasi bilan bog‘liqdir. Valiahd 2011-yili vafot etgan edi.

Hibsga olinganlarning qolgan qismi esa mansabdor shaxslardir.

Necha kishi ushlangani aniq aytilmayapti. Bu borada hali biror rasmiy bayonot berilmadi.