Rim papasiga Lamborghini sovg‘a qilindi. Endi u auksionda sotuvga qo‘yiladi

Italiyaning superkarlar ishlab chiqaruvchi Lamborghini kompaniyasi Rim papasi Fransiskka Huracan kupesini sovg‘a qildi. Biroq papa mazkur ikki eshikli avtomobilda yurmaydi. Mashina auksionga qo‘yiladi, undan tushgan mablag‘ esa xayriya ishlariga yo‘naltiriladi. Bu haqda “Motor” xabar berdi.

Kompaniya rahbariyati oq Huracan’ni Rim papasining Vatikandagi doimiy qarorgohi bo‘lgan “Buyuk Marta uyi” mehmonxonasiga yetkazib bergan. Papa superkarni duo qilgan va uning yukxonasi qopqog‘ida o‘z dastxatini qoldirgan.

Avtomobilni sotishdan tushgan daromad Iroqdagi xristian jamoatchiligini qayta tiklashga, qochoq ayollarga ko‘mak berishga va Afrika aholisiga tibbiy yordam ko‘rsatishga yo‘naltiriladi.