“San-Xuan” submarinasini qidirish hududi radiusi 40 kilometr bo‘lgan zonagacha qisqardi

Atlantika okeanida g‘oyib bo‘lgan Argentinaning “San-Xuan” submarinasini qidirish hududi radiusi 40 kilometr bo‘lgan zonagacha qisqardi. Bu haqda mamlakat harbiy-dengiz kuchlari vakili Enrike Balbi ma’lum qildi, deya xabar beradi “RIA Novosti”.

“Biz suv osti kemasi bo‘lishi ehtimoli yuqori hududga aniqlik kiritdik. Uning maydoni radiusi 40 kilometrlik zonagacha qisqardi. Mazkur zona maydoni Buenos-Ayresga qaraganda 20 marotaba katta”, — dedi Balbi.

Oldinroq Argentina harbiy-dengiz kuchlari “San-Xuan” g‘oyib bo‘lishiga yakka portlash sabab bo‘lishi mumkinligini bildirgan, uning vakillari esa norasmiy ravishda ekipaj halok bo‘lganini tan olgandi.