Video: Bali yaqinidagi “plastik chiqindilar dengizi”

Britaniyalik dayver Hind okeanining suvlari odamlar aybi bilan qanday ahvolga kelib qolganini tasvirga olgan videosi orqali ko‘rsatib berdi. Bali suvlarida plastik chiqindilar dengiz jonzotlaridan ham ko‘proqni tashkil etmoqda, deb xabar berdi National Geographic.

Dayver Rich Xorner tomonidan Nusa Panida oroli yaqinida tasvirga olingan video ortga qaytarib bo‘lmas ekologik falokatdan darak beradi. Suv osti baliqlar, meduza va boshqa dengiz jonzotlari o‘rniga chiqindilarga to‘lib toshgan.

Balida plastik chiqindilar muammoasi anchadan buyon mavjud. O‘tgan yilning dekabr oyida Kuta plyajiga mahalliy hukumat chiqindilar uyumi uchun sayyohlardan uzr so‘ragan holda peshlavha o‘rnatib qo‘ygandi. O‘sha vaqtda Kuta hamda uning yaqinidagi plyajlarda kuniga 50 tonnagacha noorganik chiqindilar paydo bo‘lgan. Ularni Yava orolidan mavsumiy shamollar olib kelgan. Balidagi ekologik tashkilotlar esa kuniga 5 tonnadan ortiq chiqindini yig‘ishtirib olishgagina qodir.