Yevropolga 8-mart kuni ilk bor ayol kishi rahbar etib tayinlandi

Belgiya federal politsiyasi bosh komissari Katrin De Bol Yevropol rahbari etib tayinlandi. U ushbu lavozimni egallagan birinchi ayol bo‘ldi, deya xabar beradi “RIA Novosti”.

“Kengash 8-mart kuni Katrin De Bolni Yevropolning yangi ijrochi direktori etib tayinladi. Uning hozirgi rahbari Rob Ueynraytning mandati joriy yil 1-may kuni yakuniga yetadi”, — deyiladi Yevrokengash matbuot xizmati xabarida.

Yevropol shtab-kvartirasi Gaagada joylashgan. Yevroittifoq agentligi maqomiga ega tashkilot faoliyatining yo‘nalishlari qatoriga milliy politsiya xizmatlari o‘rtasida ma’lumot almashinuvini muvofiqlashtirish, terrorizm, transchegaraviy jinoyatchilik, noqonuniy qurol oldi-sotdisi, narkosavdo va jinoiy yo‘l bilan topilgan mablag‘ni legallashtirishga qarshi kurash hisoblanadi.