Muddatli harbiy xizmatga yangi chaqirilgan askarlar birinchi marta amaliy o‘q otish mashg‘ulotida ishtirok etdi (foto)

Mudofaa vazirligiga qarashli harbiy qismlarda joriy yilda muddatli harbiy xizmatga chaqirilgan yangi askarlar Toshkent harbiy okrugi dala-o‘quv maydonida amaliy tarzda ilk bor nishonlarga o‘q otish mashqlarini bajardi. Bu haqda Mudofaa vazirligi matbuot xizmati xabar berdi.

Ular bunga qadar otishning amaliy emas, otish qoidalari va asoslari bo‘yicha o‘quv yig‘inida nazariy mashg‘ulotlarda ishtirok etgan. Tayyorgarlik mashqlari ko‘rgazmali vositalar hamda zamonaviy kompyuter trenajyorlarida olib borilgan. Yaqinda saflariga kelib qo‘shilgan askarlar dala-o‘quv maydonida tashkil etilgan jangovar qurolni qismlarga ajratish va yig‘ish, texnika xavfsizligi va jangovar pozitsiyani egallash, tik, o‘tirgan va yotgan holda hamda harakatdan nishonga otish, qurolni o‘qlash va o‘qsizlantirish qoidalari, qurolni o‘q otishga tayyorlash kabi o‘quv joylarida ishtirok etishdi.