Rossiya va Tojikiston Afg‘oniston chegarasida harbiy mashg‘ulotlar o‘tkazdi

Rossiya va Tojikiston harbiy xizmatchilari Afg‘oniston chegarasi yaqinida keng ko‘lamli harbiy mashg‘ulotlarni o‘tkazdi, deb yozadi “TASS”.

Rossiya va Tojikiston qurolli kuchlari bo‘linmalari ishtirokidagi qo‘mondonlik-shtab qo‘shma mashg‘ulotlarining asosiy bosqichi tojik-afg‘on chegarasidan 15 km masofada joylashgan Harbmaydon poligonida yakunlandi. Ikkala armiya harbiy xizmatchilari noqonuniy qurolli guruhlarga qarshi kurash bo‘yicha qo‘shma operatsiya o‘tkazishda rejalashtirish, boshqarish va birgalikda harakat qilish masalalarini mashq qildi.

Amaliy harakatlar chog‘ida maxsus topshiriqli bo‘linmalarning qo‘shma reyd-qidiruv harakatlari mashq qilindi: aniqlangan nishonlarga “Uragan” reaktiv tizimi guruhlari, hujum aviatsiyasi va vertolyotlar zarbalar berdi.