Samarqanddagi qurilish maydoni yaqinida “mo‘jiza tufayli falokat ro‘y bermadi” (foto)

Facebook’dagi “Samarqand va samarqandliklar” guruhida shaharning aeroport yo‘lidagi magistral ko‘chasida turar joy qurish jarayoniga taalluqli fotolar e’lon qilindi.

“Temir-beton to‘siq hech narsadan bexabar bolalar o‘ynayotgan uy yaqinida qulagan. Mo‘jiza tufayli falokat ro‘y bermadi. Bunga barpo etilayotgan turar joy quruvchilari javobgar”, — deyiladi Alish Nabiyev qoldirgan xabarda.

Tarmoqda ko‘pchilik foydalanuvchilar mazkur holatga munosabat bildirgan.

“E’tibor bering — kotlovan hozirda 5 kishidan iborat oila, jumladan, 2 nafar bola (ulardan biri nogiron) yashayotgan uyning shundoq ostida qazilmoqda. Na xavfsizlik texnikasiga rioya etilgan, na to‘siq bor. Savol tug‘iladi — bu binoni qurayotgan kishilar qanchalik professional?” deya taajjublanadi ulardan biri.