O‘zbekiston Adliya vazirligida AQSh vakillari bilan uchrashuv bo‘lib o‘tdi

2018-yilning 19-aprelida O‘zbekiston Respublikasi Adliya vazirligida O‘zbekiston Respublikasi adliya vaziri Ruslanbek Davletovning Amerika Qo‘shma Shtatlarining O‘zbekistondagi elchisi Pamela Spratlen va AQSh Xalqaro Taraqqiyot Agentligining (USAID) O‘zbekistondagi ofisi direktori Geri Robbins bilan uchrashuvi bo‘lib o‘tdi, deb yozadi UzDaily.

Adliya vazirligi rahbari mehmonlarni O‘zbekiston Respublikasi Adliya vazirligining o‘tgan davr mobaynidagi yutuqlari va faoliyatining asosiy yo‘nalishlari bilan tanishtirdi.

Davlat xizmatlarini ko‘rsatishda korrupsiyaning oldini olish va byurokratik to‘siqlarni yo‘qotish maqsadida vazirlik huzurida Davlat xizmatlari agentligining tashkil etilishi, shuningdek, O‘zbekiston Respublikasi Prezidentining davlat huquqiy siyosatini amalga oshirishda adliya organlari va muassasalari faoliyatini mukammallashtirishga qaratilgan farmonining qabul qilishini shular jumlasidandir.

O‘z navbatida, Pamela Spratlen mazkur uchrashuvni tashkil etganligi uchun Ruslanbek Davletovga minnatdorlik bildirdi va vazirlik tomonidan sud-huquq islohotlarining zamonaviy bosqichdagi yangi vazifalarini amalga oshirishda ko‘mak ko‘rsatishga tayyorligini bildirdi.