Afg‘onistonda toliblarning tungi hujumi oqibatida 43 nafar politsiyachi halok bo‘ldi

Afg‘oniston g‘arbida “Tolibon” jangarilarining tungi hujumi oqibatida kamida 43 nafar politsiya xodimi halok bo‘ldi. Bu haqda “TASS” xabar berdi.

Xabar berilishicha, toliblar 10-mayga o‘tar kechasi Farah shahridagi politsiya uchastkasiga va bir nechta nazorat-o‘tkazish postiga hujum qilgan. Jangarilar uchastka binosini egallab olgan hamda qurol va o‘q-dorilarni qo‘lga kiritgan. To‘qnashuv oqibatida yana o‘n nafar politsiyachi jarohat olgan.

To‘qnashuv bo‘lgan hududga hukumat kuchlarining bo‘linmalari yuborilgan va ayni vaqtda yo‘qotilgan obyektlar ustidan nazorat qayta tiklangan.