AQSh adliya vazirligi Donald Trampning immigratsiya siyosatini qo‘llab-quvvatladi

AQSh adliya vazirligi mamlakat prezidenti Donald Trampning bir nechta musulmon davlatlardan muhojirlar kelishini cheklash haqidagi qarorini qo‘llab-quvvatlaydi. O‘z pozitsiyasini adliya vazirligi 15 sahifali hujjat bilan bildirdi, deb yozadi “Kommersant”.

AQSh hukumati fikricha, Donald Trampning buyrug‘i “prezident vakolatlarining qonuniy tarzda amalga oshirilishi hisoblanadi”.

Adliya vazirligining bayonoti 4-fevral kuni Vashington shtati federal sudyasi prezident farmonining amal qilishini to‘xtatib qo‘ygach, e’lon qilindi. Sudya prezidentning taqiqi konstitutsiyaga mos emasligi, shuningdek, davlatning manfaatlariga zarar keltirishi haqida qaror qabul qildi.

Adliya vazirligi ertasi kuniyoq apellyatsiya berdi, ammo San-Fransiskodagi Apellyatsiya sudi shikoyatni qondirmadi va vazirlikka apellyatsiya uchun yetarlicha dalil-isbotlar tayyorlashni topshirdi.