Oyda bo‘lib qaytgan amerikalik astronavt Alan Bin vafot etdi

AQShning Xyuston shahridagi shifoxonasida amerikalik astronavt Alan Bin vafot etdi. Bu haqda NASA saytiga tayanib, “RBK” xabar berdi.

Astronavtning oilasi tomonidan ma’lum qilinishicha, Bin ikki hafta oldin Fort-Ueyn shahriga safar vaqtida yuqtirib olgan “kutilmagan kasallik” sababli vafot etgan. Astronavt o‘sha vaqtda aynan qanday kasallik bilan og‘riganiga aniqlik kiritilmagan.

Astronavt 86 yoshida olamdan o‘tdi. 1963-yilda Alan Bin NASA tomonidan yangi astronavtlar guruhi uchun tanlab olingan 14 kishidan biri bo‘lgan.

Alan Bin kosmosga bir necha marta chiqqan. Dastlab u 1969-yil noyabr oyida Apollo 12 da Oy moduli uchuvchisi sifatida parvoz qilgan. O‘shanda u Yer yo‘ldoshiga qadam qo‘ygan to‘rtinchi odam bo‘lgan. Kema kapitani bilan birga Bin Oy yuzasida 31 soat-u 31 daqiqani o‘tkazgan va tuproq namunalarini yig‘ish uchun ikki marta Oy modulidan chiqqan. 1970-yilda mazkur parvoz uchun NASA Binni “Oliy xizmatlari uchun” medali bilan taqdirlagan.